கனடா பொருட்கள் மீதான புதிய அமெரிக்க வரிவிதிப்புக்கு, கனடா “டொலருக்கு டொலர்” பதிலடி கொடுக்கும் என்று பிரதமர் மார்க் கார்னி வெள்ளிக்கிழமை இரவு தெரிவித்தார். இந்நிலையில், ஒட்டாவா வோஷிங்டனுடனான வர்த்தகப் பேச்சுவார்த்தைகளை இடைநிறுத்தி, தனது பேச்சுவார்த்தைக் குழுவைத் திரும்ப அழைத்தது.
ட்ரம்ப் நிர்ணயித்த காலக்கெடுவுக்குள் இரு நாடுகளும் ஒரு விரிவான வர்த்தக ஒப்பந்தத்தை இறுதி செய்யத் தவறியதைத் தொடர்ந்து, பில்லியன் கணக்கான டொலர் மதிப்புள்ள கனடா பொருட்கள் மீது ஜனாதிபதி டொனால்ட் ட்ரம்ப் விதித்த புதிய 50 சதவீத வரிவிதிப்புகள், கிழக்கு நேரப்படி சனிக்கிழமை அதிகாலை 12:01 மணிக்கு நடைமுறைக்கு வந்த நிலையில் இந்த நடவடிக்கை எடுக்கப்பட்டது.
மார்க்கார்னி வெளியிட்ட அறிக்கை
வெள்ளிக்கிழமை பிற்பகுதியில் வெளியிட்ட ஓர் அறிக்கையில், பிரதமர் மார்க் கார்னி, கனடா வர்த்தகப் பேச்சுவார்த்தைகளை இடைநிறுத்துவதாகவும், தனது பேச்சுவார்த்தைக் குழுவை ஒட்டாவாவிற்குத் திரும்ப அழைப்பதாகவும் கூறினார். அமெரிக்காவின் நிலைப்பாட்டில் கடைசி நிமிடத்தில் செய்யப்பட்ட மாற்றங்கள் நியாயமற்றவை, பொருளாதாரமற்றவை மற்றும் எந்தவொரு ஒப்பந்தத்தின் நம்பகத்தன்மை குறித்தும் கேள்விகளை எழுப்புகின்றன என்றும் அவர் வாதிட்டார்.
புதிய அமெரிக்க வரிகளுக்கு ஈடாக கனடாவும் அதே அளவு வரி விதிக்கும் என்றும், பாதிக்கப்பட்ட தொழிலாளர்கள் மற்றும் வணிகங்களுக்கான கூடுதல் ஆதரவு நடவடிக்கைகளை வரும் நாட்களில் அறிவிக்கும் என்றும் அவர் கூறினார்.
ஒன்டாரியோ முதல்வர் ஆதரவு
ஒன்டாரியோ முதல்வர் டக் ஃபோர்ட், கார்னியின் அணுகுமுறையை ஆதரித்து, “வரிக்கு வரி, டொலருக்கு டொலர் என்ற வலுவான பதிலடிக்கு பிரதமருக்குத் தனது முழு ஆதரவும் உண்டு” என்று கூறினார்.
கனடாவின் இறையாண்மை மற்றும் பொருளாதாரப் பாதுகாப்பைப் பாதுகாக்க “எல்லாமே பேச்சுவார்த்தைக்கு உட்படுத்தப்பட வேண்டும்” என்றும், ஒன்டாரியோ தனது பங்கைச் செய்யத் தயாராக இருப்பதாகவும் ஃபோர்ட் தெரிவித்தார்.